ក្លែងក្លាយ

By Tararith

គ្រប់គ្នាបានឮចេញពីមាត់                ម្ចាស់រដ្ឋប្រកាសជួយប្រជា

ប្រជាគ្រប់គ្នាត្រូវការពារ                   មិនឲ្យផ្តន្ទាបាញ់ប្រហារ។

លោកបានដឹងដែរខ្មែរមានទុក្ខ          ឈ្មួញរឹតសម្រុកមិនស្ដាប់ការ

ណែនាំពីម្សិលដែលជាសារ             ប្រាប់ឲ្យឧកញ៉ាងាករកច្បាប់។

ឬថាឲ្យរួចតែពីមាត់                          នៅតែវាយវាត់តាមចងចាប់

ឯណាសម្ដីដ៏ឆុតឆាប់                        សូមលោកប្រញាប់ចេញបញ្ជា។

បញ្ជាឲ្យគេឈប់វាយដំ                    ហើយឈប់បង្ខំឈប់ផ្តន្ទា

បុរីកីឡាទុក្ខដូចគ្នា                             បឹងកក់គ្រាំគ្រាគ្មានពេលល្ហែ។

អ្នកដីក្រហមជួបលំបាក                   បណ្ដេញប្រាសចាកច្បាប់ហូរហែ

រាប់សិបកន្លែងទៀតជាតិខ្មែរ            ជួបដូចគ្នាដែរមិនដោះស្រាយ។

ការពិតប្រឌិតយកសំឡេង               ព្រមានលេងៗឲ្យសប្បាយ

បញ្ឆោតប្រជាពាក្យក្លែងក្លាយ          ឮឡើងជិនណាយលោកប្ដេជ្ញា៕