ឃើញច្បាស់នឹងភ្នែកគេយកដី ឮច្បាស់សម្ដីស្រែកគម្រាម
ទ្រូងឈឺចុកចាប់សាច់ហូរឈាម អ្នកមានអង្កៀមវាយបង្រ្កាប។
ដឹងជាក់ថាគេរំលោភសិទ្ធិ ប្រមាថជីវិតឲ្យដុនដាប
បង្ខំបណ្ដេញវាយធ្វើបាប ទឹកភ្នែកហូរច្រាបក្នុងបឹងកក់។
មិនខ្វល់នឹងទុក្ខសោកប្រជា ថែមទាំងផ្ដន្ទាច្បាមចាប់ឆក់
ផ្ដាច់ការកកូរសង្គមល្អក់ បោកបក់កញ្ឆក់យកតាមចិត្ត។
អ្នកដឹកនាំគួរជាទីពឹង បែរធ្វើមិនដឹងមិនអាណិត
តាមគាបសង្កត់រឹតរួតត្បិត ហើយថែមប្រឌិតទោសជោរជន់។
គេចោទថែមថាពួកប្រឆាំង ប្រឆាំងនឹងរដ្ឋជាប់ទារុណ
ការពារដីខ្លួនទោសមានធ្ងន់ អាសូរពេកពន់ខ្មែរស្លូតត្រង់។
បើទុកឲ្យពេលវេលានេះ រំលោភជាន់ជិះអស់ត្រចង់
សេរីភាពពិតនឹងបាត់បង់ សុខដុមផូរផង់រលាយដែរ។
ទឹកដីដែនខ្មែរ ខ្មែរជាម្ចាស់ រាល់ថ្ងៃឃើញច្បាស់ទុក្ខហូហែ
អ្នកមានចិនយួនឧកញ៉ាដែរ គេចកែគាំទ្រពុករលួយ ។
ដល់ពេលខ្មែររួមកម្លាំងគ្នា តតាំងពុះពាររួមជ្រោងជួយ
គ្រប់ទីកន្លែងប្រើសិទ្ធិស្ទួយ រដ្ឋពុករលួយប្ដូរមុខមាត់៕
No comments:
Post a Comment