បំណែកថ្ម

by Tararith

ថ្មប្រាសាទបែក          តូចធំបំណែក              ញែកចេញពីគ្នា

មរតកវប្បធម៌           ប្រាង្គព្រះវិហារ            គេតាមផ្តន្ទា

ដល់កំពូលភ្នំ។

ភ្នំដងរែកខ្ពស់            ប្រាសាទរងគ្រោះ         ស្ដាយទ្រហ៊ោយំ

ម្ដងហើយម្ដងទៀត     ឈ្លបឆ្លៀតបាញ់ជ្រុំ       កាំភ្លើងតូចធំ

ភ្នំរងធ្លាយធ្លុះ ។

គេមានបំណង           ទន្រ្ទានចូលឆ្លង            បើអាចគេពុះ

ប្រាង្គប្រាសាទខ្មែរ       ឲ្យជ្រុះរលុះ                 លុកលុយបំផ្ទុះ

ឈ្លានពានរាល់ថ្ងៃ។

បំណែកទាំងឡាយ     រោយរុះអន្តរាយ           មនុស្សអ្នកប្រល័យ

ថ្មរឹងម្លឹងហើយ           គេមិនសំចៃ                វ៉ៃយកស្នាដៃ

ដណ្ដើមទ្រព្យខ្មែរ។

ឱអំបែងថ្ម                 រាយអស់លម្អ             រៀងមកហូរហែ

រងគ្រោះរាប់ឆ្នាំ          ដូចគ្មានអ្នកថែ             ជាតិជិតខាងក្បែរ

តែងតែប្រហារ។

ដុំថ្មតូចធំ                   លើកំពូលភ្នំ                សុំក្ដីមេត្តា

អង្វរមនុស្សលោក     បែរបន់ទេវតា              សូមសុខថ្លៃថ្លា

នាអនាគត៕