ហោច

By Tararith

បានប្រយោជន៍ហោចជាតិ                   ឥតមាយាទឃ្លាតសច្ចៈ

ព្រលឹងអស់ព្រោះប្រាក់                       ហក់ត្របាក់ជាប់អាស្រូវ។​

ខាំជាប់ជែងយកឈ្នះ                         ជាកញ្ជះគ្រប់រដូវ

មានគំនិតបិទផ្លូវ                               សុខចិត្តនៅរស់ជាសត្វ។

បង្កើតគ្រប់បញ្ហា                               រាស្រ្តខ្លោចផ្សាជួបវិបត្តិ

ទឹកដីរបេះខ្ចាត់                                 សង្គមបាត់សន្តិភាព។

រាល់ថ្ងៃឃើញជាក់ច្បាស់                     ខ្មែរច្រើនណាស់ជាប់គំនាប

រឹតបម្រះរឹតគាប                                 ទូកទឹកជ្រាបរលត់ឃាន។                             

ចង់មានចង់បានណាស់                       របូតខ្មាសពីវិញ្ញាណ

បណ្ឌិតបានពីរៀន                              លុកទន្រ្ទានដោយលោភលន់។

ឧត្តមគតិបាត់                                    មិនប្រយ័ត្នឈឺពេកពន់

បន្ទុកលើសទម្ងន់                               ដាក់ទារុណលើជាតិផង។

ចិនចាយលុយក្រខ្វក់                           នាំឲ្យល្អក់ខ្វល់កន្លង

ជាតិខ្មែរជាប់ចំណង                            នាំគ្នាសងហោចទឹកដី៕