ព្រះកេស

By Tararith

អង្គម្ចាស់សិវៈដ៏មានឫទ្ធិ                        យោងយិតបង្កើតភពផែនដី

ថ្ងៃមួយព្រះអង្គអស់បារមី                       រូបកណ្ដាលព្រៃគេវាយដំ។

គេវាយបំបាក់កព្រះអង្គ                         ព្រះភ័ក្រផូរផង់ប្រែក្រៀមក្រំ

ព្រកេសជ្រុះធ្លាក់ទាំងបង្ខំ                       មិនសមឡើយជួបជនចិត្តខ្មៅ។   

ព្រះកេសទ្រង់បាត់ពីលើស្មា                   មិនដែលស្ដីថាដល់កូនចៅ

កដែលគ្មានក្បាលគ្មានដំបៅ                  មិនដែលឡើយហៅឲ្យត្រលប់។

ព្រះកេសបង់បាត់ស្ងាត់ដំណឹង               ដល់ណាមិនដឹងបាត់សូន្យស្ងប់

ខ្លួននៅឈរធ្មឹងមិនបញ្ចប់                      ដួលច្រើនត្រលប់ក៏មិនថា។

ក្បាលបាត់ពីខ្លួនពួនគ្រប់ទី                    គេលាក់វក់វីដល់ទីណា

ចេញផុតពីដែនដីខេមរា                        សម្ងំមិនថាពាក្យមួយម៉ាត់។

ព្រះកេសឈ្មួញដាក់លក់ដេញថ្លៃ           ប្រកាសរាល់ថ្ងៃថ្លៃពេកក្ដាត់

ថ្ងៃក្រោយខ្លួនពិតជារសាត់                     តាមស្កាត់រកឈ្មួញជួញដូចក្បាល៕