by Tararith
ថ្ងៃនេះខូចចិត្តគិតមិនយល់ ស្រមៃអំពល់ដល់រឿងចាស់
ដប់ឆ្នាំឃ្លាតផុតចិត្តមិនផ្លាស់ ឥឡូវជាក់ច្បាស់ថ្ងៃរះថ្មី ។
ថ្ងៃថ្មីចិត្តថ្មីលំនៅថ្មី គ្មានចិត្តបេតីលើសស្រស់ស្រី
បែកគ្នាយូរឆ្នាំចាំសម្ដី ផ្ដាំបងវិលវៃអូនរង់ចាំ។
បងដឹងថាស្រីថ្លៃនួនល្អង អូនរង់ចាំបងអស់ច្រើនឆ្នាំ
អូនអើយចិត្តបងសែនរកាំ នឹកឃើញបណ្ដាំអូនម្ដងៗ។
អូនមិនដឹងថាចិត្តបងផ្សា ព្រោះតែប្រាថ្នាដល់នួនល្អង
តែធ្វើមិនបានតាមបំណង មានតែគេងផ្សងតាមវាសនា។
រូបថតពាលពៅនៅជាប់ប្រាណ មិនដែលខកខានគន់ភត្រា
ចិត្តស្មោះនៅស្មោះកន្និដ្ឋា មិនដឹងថ្ងៃណាជួបជាគ្នា។
នឹកអើយនឹកណាស់ព្រលឹងបង ផ្កាក្នុងរបងចងកម្មពារ
បែកបាក់ស្នេហាបងរងារ ចិត្តសែនវេទនារាល់ៗថ្ងៃ។
មានតែសរសេរចងពាក្យនឹក ឲ្យចិត្តរលឹកដល់ស្រីថ្ងៃ
មិនបានជួបមុខស្ដាប់សម្ដី ចិត្តបងឈឺក្រៃព្រាត់ស្នេហា។
សង្ឃឹមថាបានជួបពេលមួយ បានជួបស្រស់ត្រួយបងប្រាថ្នា
ពេលសង្គមប្រែប្ដូររដ្ឋា ចិត្តបងប្ដេជ្ញារៀបការអូន៕
No comments:
Post a Comment