សម័យជោ

C write

សព្វថ្ងៃហៅសម័យសែនជោ                 ខ្មែរស្រែកធ្ងរយំរកជំនួយ

បញ្ហាជាច្រើនសុំលោកជួយ                  ប្រជាគេងព្រួយរាល់ៗថ្ងៃ។

អ្នកមានអំណាចរឹបយកដី                     កាប់ទន្រ្ទានព្រៃឥតសំចៃ

ពួកនេះធ្វើធំដូចបានដៃ                          បំផ្លាញរាល់ថ្ងៃសម្បត្តិជាតិ។

មួយក្រុមនាំគ្នាពុករលួយ                      គ្មានចិត្តលើកស្ទួយខ្មែរយើងទៀត

មានតែចិត្តក្បត់ចិត្តចង្អៀត                     ជននេះចោលម្សៀតក្នុងសង្គម។

ឧកញ៉ាខ្លះទៀតឆ្លៀតឈ្លានពាន              ដីផ្ទះរាស្រ្តមានគេអូសផ្តុំ

ទន្រ្ទានយកទៅឲ្យរាស្រ្តយំ                    បង្កើតគំនុំក្នុងនគរ។

បែរទៅអ្នកច្បាប់តុលាការ                     គ្មានធម៌មេត្តាគ្មានអាសូរ

ទទួលសំណូកច្បាប់បែរប្តូរ                    យុត្តិធម៌ទិញដូរសជាខ្មៅ។

បាតុកម្មរាល់ថ្ងៃយើងចង់បាន                 សុំក្ដីសុខសានដល់កូនចៅ

ឈប់ជិះជាន់រាស្រ្តតទៀតទៅ                 ឲ្យខ្មែរមានផ្លូវចម្រើនផង។

ឬមួយសម្ដេចមិនបានដឹង                      ស្រុកទេសគាំងទ្រឹងជាប់ចំណង

ឬក៏អស់លោកចូលរួមផង                      ប៉ងឲ្យជាតិខ្មែររលាយសូន្យ៕