គងថ្ងាស

by C write

លើកដៃគងថ្ងាសឲ្យស្រឡះចិត្ត           តែបែរជាគិតដល់ជាតិខេមរា

មិនដឹងថានឹងទៅជាយ៉ាងណា?           ចិត្តគិតប្រាថ្នាឲ្យជាតិថ្កើងថ្កាន។

គិតហើយគិតទៀតអធ្រាតយន់ជ្រៅ      គងថ្ងាសរកផ្លូវត្រូវធ្វើឲ្យបាន

ផ្លាស់ប្ដូរសង្គមរលួយសាមាន             រុងរឿងមិនខាននាអនាគត។

គងគិតកេងគិតគិតពីជាតិខ្មែរ             រងទុក្ខឥតល្ហែស្ទើរតែរលត់

រលីងស្ទើរផុតគួរឲ្យរន្ធត់                   សៀមយួនបំផ្លាញដុតគ្រប់សម័យ។

គិតអើយគិតដល់អនាគតខ្មែរ             ដែលធ្លាប់ពូកែហើយមានស្នាដៃ

សាងប្រាសាទអង្គរវត្តល្បាញល្បី         សព្វថ្ងៃបានអីទុកជាប្រវត្តិ។

គិតទៅឃើញផ្លូវកសាងជាតិសាសន៍     ឃើញយ៉ាងជាក់ច្បាស់មិនភ្លាំងភ្លាត់

បើអនុវត្តច្បាប់កុំថាតែមាត់                កុំអាងវាយទាត់ចាប់រាស្រ្តដាក់គុក។

បើយករាស្រ្ដជាធំត្រូវស្តាប់តាម           ឃើញរាស្រ្ដរហាមត្រូវតែសម្រុក 

លើកតម្កើងគ្នាតាមភូមិស្រុក              ឈ្មុសឈ្មុលរកសុខឲ្យគេផង៕