ថ្កោលទោស

by Tararith

ប្រាសាទល្អស្អាតនៅជ្រងំ          កណ្ដាលខ្នងភ្នំក្នុងព្រឹក្សា

មានរូបចម្លាក់ក្បាច់រចនា            គួរឲ្យចេតនាចង់គយគន់។

លើភ្នំដងរែកខ្ពស់គ្រលួច           អន្ទងអង្កួចគ្រប់ជាតិជន

ឲ្យស្ងើចស្នាដៃវិចិត្រពន់            រែកទ្រទម្ងន់មហន្តរាយ។

រូបនាគរូបសឹង្ហលេចត្រដែត       លយផុសអណ្ដែតនៅមិនឆ្ងាយ

បុប្ផារម្យាក៏ភាយសាយ              ក្លែបក្លិនទាំងឡាយចេញពីភ្នំ។

អាណិតព្រលឹងជាប់ផែនថ្ម         ខ្លះរះលម្អខ្លះទួញយំ

តាមសំឡេងរៃឲ្យរងំ                 ទីស្ងាត់ជ្រងំសែនកណ្ដោច។

សូរសៀងយំយែកពីប្រាសាទ     ដែលចោរប្រមាថបាញ់បង្ហោច

បង្ហិនព្រលឹងឲ្យផ្សាខ្លោច            សៀមពិតអសោចជាតិមិនខាន៕