កណ្ដាលវាលស្រែសង្វេគចិត្ត ថ្ងៃក្ដៅខ្លាំងពិតទ្រាំស្ទូងដក
សម្លឹងរកទឹកទៅគ្រប់ច្រក បានត្រឹមតែខកឪបំណង។
ពីមុនដីស្រែមានទឹកប្រៀប ស្រូវមិនដែលក្ដៀបស្រែអ្នកផង
ទឹកហូរពោរពាសគ្មានរបង ហូរនាំក្តាមខ្យងចូលក្នុងស្រែ។
ព្រលិតត្រកូនដុះប្រជ្រៀត ម្អមមានព្រោងព្រាតនៅក្បែរៗ
កាលនោះស្រុកទេសឥតប្រួលប្រែ បានស្រូវហូរហែរស់សុខសាន្ត។
ពេលនេះស្រែខ្លះដោតគ្រឹះថ្ម ឈ្មោះជាប់សសរទាំងប៉ុន្មាន
ជាឈ្មោះអ្នកធំគេមានបាន មកពាំងរំខានផ្លូវទឹកហូរ។
ចាប់ព្រួយព្រោះស្រូវក្នុងជង្រុក ស្ដុកទុកថ្ងៃមុខមិនបរិបូរណ៍
ឆ្នាំនេះស្រែអើយគួរអាសូរ ប្រហែលត្រូវប្ដូរម្ចាស់មិនខាន៕
No comments:
Post a Comment