សំឡេងផ្គលាន់ឮគ្រលួច ខ្យល់អើយបក់គួចនាំភ្លៀងមក
ទាំងយប់ទាំងថ្ងៃដុំពពក ខ្មួលខ្មៅគគោកលើវាលស្រែ។
ទឹកដក់តាមវាលដ៏ធំធេង រនាស់រាស់រេងស្មៅហូរហែ
ក្លិនម្អមភាយចេញតាមខ្យល់ដែរ ក្ដាមខ្យងជួបស្នេហ៍ដើមរដូវ។
ឪសត្វលលកហើរទាំងហ្វូង ចេញពីជ្រលងសំដៅទៅ
ទីវាលពង្រោះចឹកគ្រាប់ស្រូវ តែត្រូវម្ចាស់ស្រែបង្កូកដេញ។
ឯគោក្របីកជាប់នឹម ផ្ដល់ក្ដីសង្ឃឹមខំបញ្ចេញ
កម្លាំងពលំលុះហូរចេញ កាត់ភក់រលេញកណ្ដាលភ្លៀង។
ក្មេងខ្លះរើសខ្យងបេះត្រកួន ខ្លះសូរក្រអួនបញ្ចេញសៀង
ស្រណោះម្ចាស់ស្រែខ្លះកាន់ឈ្នាង ជញ្ជាត់វាត់វាងតាមកូនត្រី។
បាយប្រហុកដុតខ្ចប់ស្លឹកចេក ត្រីកប់ឆ្ងាញ់ពេកអន្លក់ខ្ចី
ជីវិតអ្នកស្រែមានរសន័យ មិនដែលព្រួយភ័យខ្លាចក្ដីក្រ។
មិនដែលគិតចង់បានអំណាច មិនឲ្យគេខ្លាចកោតកុះករ
ប្រាថ្នាតែសុខសាន្ដបវរ បានរស់កំដរទ្វីបលោកិយ៕
No comments:
Post a Comment