គិតខ្លី

By C write

ដំណក់ភ្លៀងធ្លាក់លើធរណី                ស្រក់ពាសពេញទីលើវិថី

អ្នកខ្លះគិតវែងខ្លះគិតគិតខ្លី                  សញ្ជឹងរំពៃដល់កិច្ចការ។

អ្នកគិតវែងឆ្ងាយស្ដាយវេលា               ត្រូវទឹករងារក៏មិនថា

ប្រឹងទប់ជំហរធ្វើយ៉ាងណា                  កាត់ភ្លៀងប្ដេជ្ញាទៅដល់ទី។

ត្រូវជួយជីវិតជនឯទៀត                      ប្រសិនមិនឆ្លៀតពិតវក់វី

ស្ដាយក្រោយនឹងស្ដាយគ្រប់នាទី         រួសរាន់សំភីទៅឲ្យដល់។

ឯជនគិតខ្លីនៅជ្រៀតជ្រក                   រត់រកជម្រកតក់ក្រហល់

ខ្លាចភ្លៀងទទឹកប្រាណខ្វាយខ្វល់         មិនបានគិតដល់អ្នករង់ចាំ។

ប្រទេសកំពុងតែមានទុក្ខ                    ប្រជាចាប់ចុករាប់សិបឆ្នាំ

ខ្វះសិទ្ធិសេរីរស់រងកម្ម                       ម្ង៉ៃៗរង់ចាំអ្នកសង្រ្គោះ។

បើមានអ្នកគិតខ្លីច្នេះណា                    ជីវិតខ្លោចផ្សាធ្លាក់ក្នុងជ្រោះ

រំពឹងនឹងស្លាប់ច្រើនជាងរស់                 ព្រោះអ្នកសង្រោះខ្វះឆន្ទ:៕