ក្រៅឆាក

By Tararith

ជាសច្ចៈធម៌ប្រវត្តិសាស្រ្ត                   គួរឲ្យអាម៉ាស់ពេលបានឮ

ប្រកាសក្ដែងៗយ៉ាងរន្ទឺ                     ឆ្លើយឆ្លងបញ្ឈឺទៅនួនជា។

តែមិនហ៊ានចូលទៅតតាំង                 បានត្រឹមប្រឆាំងពីក្រៅទ្វារ

ជាសារប្រាកដគាំទ្រគ្នា                     ចៀសច្បាប់ផ្ដន្ទាជាប់អាស្រូវ។

តុលាការមិនទាន់សម្រេច                  វិនិច្ឆ័យស្រេចថាត្រឹមត្រូវ

បើសិនប៉ះយួនកែតម្រូវ                     គិតគូបិទផ្លូវមិនតទល់។

នួនជាថាយួនចង់ត្រួតខ្មែរ                  ប្រតិកម្មហូរហែចេញពន្យល់

នួនជាឆ្លើយពិតនាំអំពល់                   ជីកឫសជីកគល់សារសៅហ្មង។

ណ្ហើយបិទទូរទស្សន៍កុំផ្សាយផ្ទាល់     កុំឲ្យប៉ះពាស់មិត្តភាពផង

ឆាប់បញ្ចប់ទៅរឿងកន្លង                   បន្ដនាំឆ្លងរីករាលដាល។

រីករាលទៅដល់អ្នកមានយស             តំណែងធំខ្ពស់រាប់រជ្ជកាល

នឹងបាត់មិត្តភាពដ៏ត្រកាល                 ខ្មែរយួនលើថ្នាលឥណ្ឌូចិន៕