ពួយរលុក

By Tararith

មានបានមានឡានមានវីឡា                                          មានប្រាក់ដុល្លារចាយមិនអស់

សួនច្បារមុខផ្ទះលេចសម្រស់                 ផ្ការីកស្រស់ៗដាំថ្មីៗ។

ធនធានដែលមានកើតរហ័ស                  ដឹងច្បាស់បានពីងារមន្រ្ដី
ពីឋានៈខ្ពស់ដូចត្នោតលៃ                        និងបានពីប្ដីមានអំណាច។

ប្រាក់ខែប្រាក់ខ្មែរតែបន្ដិច                       ធ្លាប់ចំណាយច្បិចព្រោះមិនអាច

ទ្រទ្រង់ជីវភាពដ៏ដោចដាច                      ឥឡូវមិនខ្លាចពុករលួយ។

រស់ក្រយូរហើយក្ររហាម                      ឆីតែខ្យងក្ដាមគ្មានអ្នកជួយ

ដល់មានឋានៈបុណ្យស័ក្កស្ទួយ                ត្រូវតែវ័ធពួយឲ្យអស់ដៃ។

កុំឲ្យគេថាក្រម៉ាពូជ                               ឲ្យគេប្រដូចជនថ្លាថ្លៃ

មានបានរស់រានអស់ចង្រៃ                      អាចសំចៃបានភ្វើបុណ្យផង។

ពេលមានលុយកាក់ប្រាក់ពោរពាស          ទាំងស្ដេចទាំងរាស្រ្តហែរត្រសង

មុខមាត់អំណាចធំកន្លង                          ជាតិនេះឆ្លងម្ដងក៏អស់ចិត្ត៕