ស្មូម

By Tararith
 

_{អ្នកមានហោះហើរដើរកំសាន្ត                 រីករាយគ្រប់ឋានលើលោកកីយ៍}

_{រូបថតបង្ហាញស្រស់ប្រិបប្រិយ៍                ម្ហូបអាហារឆីក៏សម្បូរណ៍។}

_{ចេញពីអាស៊ីទៅអ៊ឺរ៉ុប                           កម្សាន្ដមិនឈប់បែរត្អូញថ្ងូរ}

_{ថាដើរច្រើនហត់គួរអាសូរ                     ប្រាក់ចាយបរបូរប្ដូរសប្បាយ។}

_{សប្បាយជួនមានជួនក៏អត់                     ដើរច្រើនកម្សត់ព្រោះជិនណាយ}

_{ឯជនក្រីក្រឆ្នាំងគ្មានបាយ                      រករស់ប្រញាយទៅក្រៅស្រុក។}

_{ខ្មែរអ្នកក្រីក្រទៅទាំងក្រុម                      គ្រួសារជួបជុំនៅសំកុក}

_{តាមចិញ្ចើមផ្លូវពោលលំអុក                   បន់ឲ្យគេសុខប្ដូរកម្រៃ។}

_{មានចាស់ និងក្មេងមិនដឹងក្ដី                   បីចាកទឹកដីទៅស្រុកថៃ}

_{ម្រាមដប់បួងសួងទាំងយប់ថ្ងៃ                 សូមឲ្យជាតិថៃបានរុងរឿង។}

_{ប្រាក់កាក់ដែលបានមកពីទាន                ជាស្ពានចំអកភ្លឺព្រឿងៗ}

_{ដែលសៀមគ្រប់ពណ៌ក្រហមលឿង         ចិត្តសឿងរំលងលោភខ្មែរ។}

_{បើគេមាក់ងាយយ៉ាងដូច្នេះ                    អ្នកមានអ្នកចេះអ្នកពូកែ}

_{គន់គិតយ៉ាងណាអ្នកជាខ្មែរ                    ព្រងើយមិនថែ ឬបែរស្ទួយ៕}