Friday, May 3, 2013

ឃ្លាត

By Tararith



ស្រះទឹកព្រលិតរីកព្រោងព្រាត               ទំពាំងដុះជ្រៀតភ្លូសថ្មីៗ
ចេកចេញត្រយ៉ូងផ្លែខៀវខ្ចី                     រមនាទឹកដីស្រែចម្ការ។
ក្នុងក្រោលមានគោនិងក្របី                   ទ្រុងមានបក្សីសូរខ្ញៀវខ្ញា
រស់រៀនមិនដែលមានទុក្ខា                     ខួបប្រាំងវស្សាសុខសេរី។
ឥឡូវស្រុកទេសបែរប្រែប្រួល                 ខ្មែររត់ស៊ីឈ្នួលទាំងប្រុសស្រី
ទៅសៀម-ម៉ាឡេ-កូរ៉េក្ដី                         គេចពីក្រក្រីដ៏សោកសៅ។
ថ្ងៃស្អែកខ្ញុំក៏នឹងបែកដែរ                        ឆ្ងាយពីស្រុកខ្មែរទៅស្រុកក្រៅ
ជីវិតមិនដឹងជួបសខ្មៅ                           ផ្សងចៀសរណ្ដៅតាមបំណង។                       
ឪមាតុភូមិដ៏រឮក                                  ផ្ទះអើយធ្លាប់នឹកឆ្ងាយម្ដងៗ
ពេលនេះត្រូវចេញយូរកន្លង                   ឃ្លាតពីប្អូនបងញាតិសណ្ដាន។
ទឹកអណ្ដូងស្ទប់សប់ដាក់ពាង                ឆ្នាំងចានធ្លាប់លាងទាំងប៉ុន្មាន
ឧសធ្យូងដុតដាំនឹងជើងក្រាន                 ម្ដងនេះពិតខានបានសម្អាត។
ផ្ទះអើយផ្ទះខ្ទមខ្ញុំសូមលា                      យើងទុក្ខដូចគ្នាគេប្រមាថ
អ្នកមានយសសក្ដិប្រាក់រាតត្បាត            តែងឲ្យឪវាទលក់ផ្ទះដី។
អ្នកមានដដែលអន្ទងប្រាប់                    រាល់ដងរ៉ាយរ៉ាប់ពាក្យវែងខ្លី
ខ្ញុំអាចផុតក្រលក់អ្វីៗ                            ពិសេសផ្ទះដីយកដុល្លារ។
ខ្ញុំមិនដាច់ចិត្តលក់ដីកេរ                        កេរពីបុព្វេបស់ដូនតា
មិនគួរឡើយបង់ពេលនេះណា               តាំងចិត្តធ្វើការនៅស្រុកគេ។
ក្រអើយក្រទ្រព្យជាប់នឹងប្រាណ             សង្ឃឹមមានបានទៅកូរ៉េ
ធ្វើជាកម្មករមិនផុតទេ                           ធ្វើការឲ្យគេដូរកម្រៃ។
មិនថាលំបាកធ្ងន់ប៉ុនណា                      សច្ចាធ្វើការទោះយប់ថ្ងៃ
សន្សំប្រាក់ខែជូនម្ដាយថ្លៃ                      សំចៃរំដោះអស់បំណុល៕

No comments:

Post a Comment