រើបំរះ

By Tararith

ផ្លូវតុលាការក៏ទៅប្ដឹង                           អាម៉ាស់ខ្លួនរឹងសឹងដូចថ្ម

ត្រូវទៅជាខុសខ្មៅប្រែស                     ច្បាប់ចែងច្បាស់ល្អគេលាបពណ៌។

អ្នកភូមិបឹងកក់រើបំរះ                           ខំណាស់ព្រោះខ្វះយុត្តិធម៌

ដៃជាប់ច្រវ៉ាក់មិនគួរជឿ                     នេះអស់ជំនឿប្រសិនធៀប។

តវ៉ារាប់រយលើកទៅហើយ                 នៅគ្មានចម្លើយបែររឹតគាប

នាយទុននិងរដ្ឋក្រឺតមានប្រៀប           ឈ្នះខ្មែរតូចទាបជនក្រក្រី។

មានទាំងបូមឈាមចេញពីប្រាណ      គេចាប់ចូលឡានព្រាត់កូនប្ដី

គ្រឿងចក្របំបាក់ផ្ទះចាស់ថ្មី               បាតករស្រីៗកាយអាក្រាត។

ជូនញត្តិបណ្ដឹងសព្វស្ថាប័ន                សាលាក្រុងខណ្ឌតបប្រមាថ

បាតដៃខ្នងដៃប្ដល់ឱវាទ                      បំណងស៊ីស្អាតមិនឲ្យសល់។

អ្នកភូមិបឹងកក់ទាំងក្មេងចាស់             ជំហរមិនផ្លាស់ដើរតាមថ្នល់

ទាមទារតវ៉ាដោះស្រាយកល               ល្បិចគេបន្សល់លុះសព្វថ្ងៃ។

បើគេមានចិត្តចង់បញ្ចប់                      ខ្សាច់មិនហូរកប់-ប៉ូលីសវ៉ៃ

បាតុករមិនបាច់ជាប់ខ្នោះដៃ               ឲ្យល្បីសម័យតេជោឡើយ៕