ឆ្នាំថ្មី

By Tararith

ជនជាតិខ្មែរទោះនៅទីណា                    ដំណែលដូនតាតែងនាំទៅ

មិនដែលទម្លាក់ចោលតាមផ្លូវ                 លុះលង់ឥឡូវនៅគោរព។

ជាខ្មែរនៅថែនៅរក្សា                             មរតកថ្លៃថ្លាតែងប្រារព្វ

រម្លឹកគុណបុណ្យធ្វើសព្វគ្រប់                  មិនថាថ្ងៃយប់តៗគ្នា។

ឥឡូវចូលឆ្នាំថ្មីមកដល់                          បុណ្យទានមគ្គផលមានរៀងរា

ទោះបីឆ្ងាយដែនកម្ពុជា                         ខ្មែរមានវិហារអារាមវត្ត។

សាងទុកសម្រាប់ជំនាន់ថ្មី                      ឲ្យដឹងសេចក្ដីយល់ប្រវត្តិ

ទោះបីរសាត់ឆ្ងាយចាកព្រាត់                  វត្តដូចជារដ្ឋកំណើតមួយ។

ភាសាធម៌អាថ៌គឺជាគ្រឹះ                         ជាខ្មែរមានឫសពន្លកត្រួយ

ទោះដុះទីណាខ្មែរតែមួយ                      សូមជួយបីបាច់ថែរក្សា។

ចូលឆ្នាំថ្មីប្រពៃណីជាតិ                          រវល់ក៏ឆ្លៀតសែនទេវតា

ឡូវែល[1]មិនខ្វះឡើយវត្តវ៉ា                   នាំក្រុមគ្រួសារទៅអបអរ។

ខ្មែរអាមេរិកមិនភ្លេចម្ដង                        បុណ្យទានរាល់ដងធ្វើឈូឆ

ទទួលទេវតាតាំងលម្អ                           ទំនៀមមានតជំនាន់ថ្មី។

យើងអភិរក្សវប្បធម៌                             ឲ្យគង់ជាពណ៌ប្រពៃណី

ខំរៀនភាសាពាក្យសម្ដី                          អត់ធ្មត់ខន្ដីខ្មែរដូចគ្នា។

បំណងយើងមានរៀនឲ្យចេះ                  ចេះយកចំណេះទៅគាំពារ

ទឹកដីខេមរាលែងរងា                            ដែនកម្ពុជានឹងសុខសាន្ដ៕

---

[1] ទីក្រុងឡូវែល រដ្ឋម៉ាស្សាឈូហ្សិត សហរដ្ឋអាមេរិក។ ទីក្រុងនេះមានប្រជាជនខ្មែររស់មិនតិចជាងបីមឺននាក់ មានវត្តអារាម មានព្រះសង្ឃ ដែលងាយសម្រាប់ពុទ្ធបរិស័ទធ្វើបុណ្យទានតាមប្រពៃណីខ្មែរ។