Wednesday, October 17, 2018

កង្កែប

By Tararith



កង្កែបរស់អែបបឹង                           យំទ្រហឹងរំពងព្រៃ
ឆ្លើយឆ្លងឈ្លោះរឿងអី                      អួតសម្ដីក្លាដល់ម្លឹង។
អួតចុះអួតឡើងឫក                         ងើបពីទឹកខ្លួនកំប្រឹង
ស្គមស្វិតឃើញស្បែកឆ្អឹង                  ភ្នែកសស្លឹងឌឺដងគ្នា។
លោតចុះលោតឡើងច្រាំង                ត្រៀមចេញច្បាំងដើម្បីងារ
អ្នកខ្លាំងមហិមារ                              លើធារាដងព្រឹក្សា។
ក្អេងក្អាងអាងសំឡេង                       ហៅអ្នកលេងធ្វើអាណា-
ព្យាបាលដែនសីមា                          ខុសប្រាថ្នាអស់ទឹកដី។
ម្លឹងហើយមិនរាងចាល                      នៅត្រអាលថ្លោសសម្ដី
ជេរឈ្លោះគ្នាឥតបី                           លើដែនដីទ្វិបលោកផ្សេង។
ដណ្ដើមគ្នារកត្រូវ                             ទោះអស់ផ្លូវដើរវង្វេង
នៅធ្វើឬកអ្នកលេង                          ឈ្លោះផ្សងព្រេងគ្មានគោលដៅ។
មិនដឹងប្រាថ្នាអ្វី                               ចេញពីព្រៃគម្ពោតស្មៅ
នៅមិនឃើញខ្លួនខ្លៅ                        រកសខ្មៅមិនចប់សោះ។
មួយៗខ្លាំងផុតមេឃ                         សំឡេងជ្រែកព្រៃរបោះ។
ឈ្លោះគ្នាទាល់តែអស់                       ទឹកដីកោះកេរដូនតា៕


No comments:

Post a Comment